أكدت الفنانة ليلى طاهر، أن قرار ابتعادها عن الفن نهائي لا رجعة فيه، قائلة إنها تريد أن يحتفظ الجمهور بصورتها قبل إعلان اعتزالها، خاصة أن الأعمال التي تُعرض عليها حاليًا ستقلل من مشوارها الفني، على حد قولها.
ليلى طاهر: مش هرجع للفن وده قرار نهائي
وأوضحت ليلى طاهر في تصريحات تليفزيونية: مش هرجع للفن وده قرار لا رجعة فيه، وأنا بقول إني عملت كل حاجة واشتغلت في كل المجالات الفنية السينما والمسرح والتليفزيون، وأنا قفلت صفحة مشواري الفني، لأن من بعد الثورة توقف الفن وأنا بعدت عن الفن فترة، وبعدين رجعت للفن وعملت حاجات تانية لفترة محددة وبعدين قولت خلاص كفاية كدة.
وتابعت: أنا عملت حاجات كتير حلوة في كل المجالات وربنا وفقني فيها وكسبت ثقة الناس، وأنا مش عايزة أعمل تاني حاجات بعد الفترة الطويلة دي تقلل من اللي عملته، لأن اللي هيجي هيبقى أقل لأن السن بيحدد الأدوار، وبقول أنا سيبت تاريخ حلو وكدة خلاص كفاية.
سبق وأعربت الفنانة ليلى طاهر عن استيائها الكبير من الشائعات التي لاحقتها في الفترة الماضية، بعد أن تعرضت لوعكة صحية، وقالت في تصريحات صحفية: بيقلقوا الناس عليّا، قالوا رجلها اتقطعت وماتت، وأنا الحمد لله كويسة، لكن مش أنا لوحدي، دا كل الفنانين بيطلع عليهم شائعات، بيشتغلوا علينا وبيكتبوا عنا بلاوي، وللأسف الناس بتهتم بهذه الأخبار وتقرأها، وإحنا في الحقيقة مفيش حاجة حصلت لنا.
