أجمل أيام العبادة مع أطفالنا ، اجمل رمضان مع أولادنا؛تعالوا نرى الجمال ، والكثير منا لا يأخذه فى الاعتبار. رمضانك وأنتِ مع حبات القلب، براعم صغيرة بتتعلم وتتربي. أنتِ متخيلة إنهم بيمنعوكِ من العبادةولا تعلمي أنكِ معهم في عبادة من أهم ما يكون . أنتِ بتربي عباد لله ، تخرجي جيلا موحد لله . دوشتهم وصداعهم مأجورة فيها . تعالي نعيشهم أحلى رمضان مع حبات القلب . ونجعلهم ينتظوا رمضان كل عام بفرحة . نعيشهم رمضان صح ونربيهم على سنة النبي صل الله عليه وسلم.
اصنعي لهم البهجة،قبل رمضان اشتري لهم لبس مخصوص للصلاة ،، الولاد بتفرح جدا بالاهتمام والخصوصية. من سن سنتين بيفهموا الاختلاف، اعملي معاهم زينة بالورق وقصيها زي بتاعة زمان خليهم يعلقوها في غرفتهم أو البلكونة .هاتي سجاد من الصغير سعره بسيط وألوانه مبهجة عشان يحسوا بخصوصيتهم ويعملوا سباق مين هيخلص 100 . سبحان الله الأول و قوليلهم إنها بتزرع في الجنة نخلة ساقها ذهب .اعملي بيهم دايرة وقوليلهم يلا نحوش كنز في الجنة ونقول لا حول ولا قوة إلا بالله . قوليلهم يلا نقرأ القرآن سوا ومسكيهم أجزاء صغيرة وخليهم يقرأوا معكِ. قرأتكِ معاهم هتخليهم يحبوا القرآن وده ثوابه أعلى ما تقرأي لوحدك وتسيبيهم أمام الشاشة يتفرجوا على خراب العقول والدين . وقت تحضير الفطار خلي دورهم يحطوا في الأطباق التمر بعدد وفهميهم هنفطر زي سيدنا محمد صل الله عليه وسلم . اعملي جوائز الصيام. بلالين ملونة جواها أنواع مختلفة من الحلوى والهدايا البسيطة. مثلاً لغاية الظهر بالونة صفرة جواها هدية . لغاية العصر بالونه خضرة جواها هدية أحلى لغاية المغرب اعمليله تاج من الورق المفضض وهدية نقدية . اعملي جدول كل أذان واحد فيهم هيسبق يفرش سجاد الصلاة واحكيلهم قصص الأنبياء أو الصحابة في ميعاد ثابت ينتظروكِ زي ما بيستنوا الكارتون اللي خرب عقول العيال .لو مش عارفة القصص فرصة تتعلمي معاهم هاتيها من مواقع ثقة زي *قصة الإسلام* مثلاً أو انزلي أي مكتبة إسلامية هتلاقي قصص أطفال إسلامية جميلة جداً ومصورة . علميهم الصلاة و اتعلمي معاهم فرصتك تبني نفسك مع ولادك . الاهتمام بيهم في رمضان أهم من الاهتمام بالتنضيف و العزايم وبرامج قنوات الطبخ. الاهتمام بيهم وتربيتهم فرض. والتراويح سُنة والفرض أولى من السُنة. كل القيم في حياتنا مقلوبة. أم الاطفال …..عبادتها الأساسية هي تربية الأطفال . خلي حبات قلوبنا أولوية في حياتنا.لو أنتِ أم، جدة، خالة، عمة، أخت.ممكن تقدري يكون لك نصيب من هذه الأفكار بحسب استطاعتك فلا تبخلي.
*فكل معروف صدقة*
